Panama kanalından tranzit keçən gəmilərin sayı artacaq

Müəllif: Sevgul Gasimzade
Nəşr edilmişdir: 18.04.2024 14:07

Panama kanalında suyun səviyyəsi yaxşılaşdıqca gəmi rezervasiya yerləri və tranzit keçən gəmilərin sayı artacaq.

Allmarinenews xəbər verir ki, bu barədə Panama Kanalı İdarəsindən məlumat verilib. Bildirilib ki, Gatun gölündəki mövcud və təxmin edilən su səviyyələrinə cavab olaraq mayın ortalarından başlayaraq Panamax kilidləri üçün rezervasiya yerlərinin sayı artıb.

Yeni qrafikə uyğun olaraq, mayın 7-dən mayın 15-dək planlı təmir işləri ilə əlaqədar hər gün 24 gəmi üzəcək. 

Bundan əlavə, iyunun 1-dən etibarən Neopanamax tipli gəmilər üçün  əlavə bir yer açılacaq, keçidlərin növbəti bildirişə qədər gündə 32-ə çatacağı gözlənilir.

Qeyd edək ki, 2023-cü ildə baş verən böyük quraqlıqdan sonra Panama Kanalı İdarəsi gündəlik gəmi tranzitlərinin sayını və maksimum su axınını azaltmaqla gəmi keçidlərinin sayına məhdudiyyət tətbiq etmişdi.