İran Rusiya mallarının Hindistana daşınması üçün ticarət dəhlizi açır

Müəllif: Sevgul Gasimzade
Nəşr edilmişdir: 13.06.2022 13:49

İranın Rusiyadan Hindistana ticarəti davam etdirmək üçün rəsmi olaraq ticarət dəhlizi açacağı bildirilib.

Allmarinenews İRNA-ya istinadən xəbər verir ki, İrana məxsus nəqliyyat şirkətləri Rusiyadan Hindistana malların daşınmasını təmin edəcək.

İranın dövlət gəmiçilik şirkəti olan İran İslam Respublikası Dəniz Yolları Qrupu Rusiyadan İran vasitəsilə Hindistana ilk kommersiya mallarının daşınmasına başlayıb. Rusiyaya qarşı sanksiyalara əsasən, Rusiya mənşəli məhsullar daha çətin yollarla Hindistana çatmalıdır. İran iki ölkə arasında ticarət dəhlizinin açılmasına razılıq verib.

 Bildirilib ki, Sankt-Peterburqdan ilk “sınaq” yükü Xəzər dənizində yerləşən Həştərxana liman şəhərinə çatıb. Həştərxandakı İran-Rusiya müştərək terminalının meneceri Dariuş Camali ticarət dəhlizinin sınaqdan keçirilməsi üçün ilk sınaq göndərişinin nə vaxt baş verdiyi barədə məlumat verməyərək, daşınma faktını təsdiqləyib.

Xəbərə görə, Həştərxandan götürülən yük Xəzər dənizi vasitəsilə İranın şimalındakı Ənzəli limanına endiriləcək. Buradan avtomobil yolu ilə Fars körfəzinin cənubundakı Bəndər Abbas limanına aparılacaq. Yükün oradan gəmiyə yüklənərək Hindistanın Nhava Şeva limanına göndəriləcəyi bildirilib.

İran İslam Respublikası Dəniz Xətləri Qrupu və Rusiya və Hindistandakı regional ofisləri tərəfindən koordinasiya ediləcək daşınmanın 25 gün çəkəcəyi gözlənilir.